“វេទិកាសេដ្ឋកិច្ចឌីជីថល ២០២៥”

image
image

“វេទិកាសេដ្ឋកិច្ចឌីជីថល ២០២៥”

អគ្គលេខាធិការដ្ឋានគណៈកម្មាធិការសេដ្ឋកិច្ច និង ធុរកិច្ចឌីជីថល (គ.ស.ធ.ឌ.) ក្រោមការឧបត្ថម្ភដោយ មូលនិធិ​ ស.អ. បានរៀបចំកម្មវិធី “វេទិកាសេដ្ឋកិច្ចឌីជីថល ២០២៥” ដែលមាន​រយៈពេល ១ថ្ងៃកន្លះ ពីថ្ងៃទី ១១ ដល់ ថ្ងៃទី ១២ ខែ មីនា ឆ្នាំ ២០២៥​ នៅសណ្ឋាគារ អូកវូដ ព្រេមៀរ ភ្នំពេញ។ វេទិកាសេដ្ឋកិច្ចឌីជីថល ២០២៥” នេះបានប្រព្រឹត្តទៅក្រោមអធិបតីភាពរបស់ ឯកឧត្តមបណ្ឌិត គង់ ម៉ារី រដ្ឋលេខាធិការនៃក្រសួងសេដ្ឋកិច្ច និង ហិរញ្ញវត្ថុ​ និង​ អគ្គលេខាធិការនៃអគ្គលេខាធិការដ្ឋាន (គ.ស.ធ.ឌ.) និង​ ឯកឧត្តម កែវ សុទ្ធិ រដ្ឋលេខាធិការ នៃក្រសួងប្រៃសណីយ៍ និង ទូរគមនាគមន៍។ វេទិកាសេដ្ឋកិច្ចឌីជីថលត្រូវបានធ្វើឡើងក្រោមគោលបំណង (១) លើកកម្ពស់ការផ្សព្វផ្សាយចំណេះដឹងអំពីបច្ចេកវិទ្យាឌីជីថល ជំនាញ និង សារៈសំខាន់នៃការចាប់យកឌីជីថលនៅក្នុងយុគសម័យសេដ្ឋកិច្ចឌីជីថល, (២) បង្កើនការចែករំលែកទស្សនទាន គំនិតនវានុវត្តន៍ និង បទពិសោធន៍ថ្មីៗ ពាក់ព័ន្ធសេដ្ឋកិច្ចឌីជីថល, និង (៣) ជំរុញការកសាងបណ្ដាញទំនាក់ទំនង និង សហគមន៍ធុរកិច្ច និង សេដ្ឋកិច្ចឌីជីថលនៅកម្ពុជា។ ក្នុងវេទិកាសេដ្ឋកិច្ចឌីជីថល ២០២៥ មានបទបង្ហាញចំនួន ៥ និង កិច្ចពិភាក្សាចំនួន ៤ ដែលផ្ដោតលើទិដ្ឋភាពរួមនៃសេដ្ឋកិច្ច និង សង្គមឌីជីថល, ការធ្វើបរិវត្តកម្មឌីជីថលសម្រាប់សហគ្រាស, អក្ខរកម្ម និង​ ជំនាញឌីជីថលសម្រាប់សហគ្រាស, សន្តិសុខសាយប័រ ការការពារទិន្នន័យ ទ្រព្យសម្បត្តិឌីជីថល និង ការទូទាត់ប្រាក់ឌីជីថល។ បទបង្ហាញនីមួយៗ បានផ្ដល់ព័ត៌មានជាមូលដ្ឋានសម្រាប់កិច្ចពិភាក្សាយ៉ាងផុសផុល ហើយនឹងទទួលបានធាតុចូលសំខាន់ៗពីវាគ្មិនកិតិ្តយស និង អ្នកចូលរួម។ វេទិកាសេដ្ឋកិច្ចឌីជីថល ២០២៥” ត្រូវបាន​បញ្ជប់ទៅក្រោមអធិបតីភាពរបស់ ឯកឧត្តមបណ្ឌិត តាំង ងួនលី ដែលបាន​អញ្ចើញចូលធ្វើសុន្ទរកថាបិទកម្មវិធី។ ជាលទ្ធផល វេទិកានេះមានអ្នកចូលរួមសរុបចំនួន ២៥៦ នាក់នៅថ្ងៃទី ១ និង ចំនួន ១៤៨ នាក់ នៅថ្ងៃទី ២ និង បានបញ្ចប់ទៅដោយរលូន តាមរយៈការផ្ដល់វេទិកាដែលបង្កើតឱ្យមានការជជែកពិភាក្សាពីសេដ្ឋកិច្ចឌីជីថល។