កម្មវិធីកិច្ចពិភាក្សាតាមក្រុមស្ដីពី "ទស្សនៈរបស់ភាគីពាក់ព័ន្ធលើសក្តានុពលរបស់ប្រទេសកម្ពុជាក្នុងការចរចាកិច្ចព្រមព្រៀងសេដ្ឋកិច្ចឌីជីថល"
ភ្នំពេញ៖ នារសៀលថ្ងៃទី ១០ ខែ សីហា ឆ្នំា ២០២៣ នៅសណ្ឋាគារអកវ៉ូតព្រីមៀរភ្នំពេញ (Oakwood Premier Phnom Penh) អគ្គលេខាធិការដ្ឋាននៃគណៈកម្មាធិការសេដ្ឋកិច្ចនិងធុរកិច្ចឌីជីថល (គ.ស.ធ.ឌ.) បានសម្របសម្រួល និងរៀបចំកម្មវិធីកិច្ចពិភាក្សាតាមក្រុមអំពី "ទស្សនៈរបស់ភាគីពាក់ព័ន្ធលើសក្តានុពលរបស់ប្រទេសកម្ពុជាក្នុងការចរចាកិច្ចព្រមព្រៀងសេដ្ឋកិច្ចឌីជីថល (Digital Economy Agreement)" ដើម្បីប្រមូលទិន្នន័យ និងវិភាគទៅលើភាពខ្លាំង ភាពខ្សោយ កាលានុវត្តភាព និងការគំរាមកំហែងទាក់ទងនឹងកិច្ចព្រមព្រៀងសេដ្ឋកិច្ចឌីជីថលនៅកម្ពុជា។
កិច្ចពិភាក្សានេះ បានរៀបចំឡើងក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត តាំង ងួនលី អគ្គលេខាធិការរងនៃអគ្គលេខាធិការដ្ឋានគណៈកម្មាធិការសេដ្ឋកិច្ចនិងធុរកិច្ចឌីជីថល តំណាងដ៏ខ្ពង់ខ្ពស់ ឯកឧត្តមបណ្ឌិត គង់ ម៉ារី អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការនៃអគ្គលេខាធិការដ្ឋានគណៈកម្មាធិការសេដ្ឋកិច្ចនិងធុរកិច្ចឌីជីថល។ កម្មវិធីកិច្ចពិភាក្សានេះ មានការអញ្ជើញចូលរួមពីសំណាក់ស្ថាប័នពាក់ព័ន្ធរួមមាន តំណាងស្ថាប័ន សាធារណៈ វិស័យឯកជន ដៃគូអភិវឌ្ឍ សមាគមពាណិជ្ជកម្ម និងស្ថាប័នស្រាវជ្រាវប្រមាណ ៥០នាក់។
ការរៀបចំកម្មវិធីកិច្ចពិភាក្សាតាមក្រុមនេះ គឺជាផ្នែកមួយនៃការប្រមូលទិន្នន័យរបស់ការសិក្សាស្រាវជ្រាវរបស់អគ្គលេខាធិការដ្ឋានគណៈកម្មាធិការសេដ្ឋកិច្ចនិងធុរកិច្ចឌីជីថល ទៅលើការវិភាគភាពខ្លាំង ភាពខ្សោយ កាលានុវត្តភាព និងការគំរាមកំហែងសម្រាប់កម្ពុជា ក្នុងការត្រៀមខ្លួនចូលរួមក្នុងកិច្ចចរចា ក៏ដូចជាការរៀបចំកិច្ចសហប្រតិបត្តិការសេដ្ឋកិច្ចឌីជីថលនាពេលអនាគត។
កម្មវិធីកិច្ចពិភាក្សាតាមក្រុមនេះ បានជជែកពិភាក្សាលើប្រធានបទចំនួន ៤ ធំៗ រួមមាន ទី១. ពាណិជ្ជកម្មឌីជីថល និងពាណិជ្ជកម្មតាមប្រព័ន្ធអេឡិចត្រូនិកឆ្លងកាត់ព្រំដែន (Digital trade and Cross-border E-commerce) ទី២. ការការពារទិន្នន័យ ឯកជនភាព សុវត្ថិភាពតាមប្រព័ន្ធអនឡាញ និង សន្តិសុខសាយប័រ (Data protection and privacy, Online safety and cybersecurity) ទី៣. បម្លាស់ទីរបស់អ្នកមានទេពកោសល្យឌីជីថល និង កិច្ចសហប្រតិបត្តិការ (Talent mobility and cooperation) និងទី៤. កិច្ចសហប្រតិបត្តិការលើប្រធានបទថ្មីៗ (Cooperation on emerging topics)។
 |
 |
 |
 |
 |
 |
 |
 |
 |
 |
 |
 |
ឯកឧត្តមបណ្ឌិត តាំង ងួនលី បានថ្លែងសុន្ទរកថាបើកកម្មវិធីដោយបានលើកឡើងពីនិន្នាការវិវត្តនៃការអភិវឌ្ឍសេដ្ឋកិច្ចឌីជីថលក្នុងតំបន់ និងសកលលោក រួមទាំងការកើនឡើងនៃការរៀបចំកិច្ចព្រមព្រៀងសេដ្ឋកិច្ចឌីជីថលដែលមានជាធរមាន។ ក្នុងនោះ ឯកឧត្តមបណ្ឌិត ក៏បានបញ្ជាក់អំពីការយកចិត្តទុកដាក់ និងផ្តល់អាទិភាពខ្ពស់របស់រាជរដ្ឋាភិបាលលើការអភិវឌ្ឍវិស័យឌីជីថលនេះ តាមរយៈការដាក់ចេញគោលនយោបាយឌីជីថលចម្បងៗ ជាអាទិ៍ ក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥, គោលនយោបាយរដ្ឋាភិបាលឌីជីថល ២០២២-២០៣៥, ការដាក់ចេញសេចក្តីសម្រេចរបស់រាជរដ្ឋាភិបាលលេខ ៥១ សសរ នៅថ្ងៃទី ១១ ខែ កក្កដា ឆ្នាំ ២០២៣ ក្នុងការបង្កើតក្រុមការងារបច្ចេកទេសជំរុញ និងគាំទ្រសេដ្ឋកិច្ចឌីជីថល និងរៀបចំកិច្ចព្រមព្រៀងសេដ្ឋកិច្ចឌីជីថល ចំនួន ១៣ ក្រុម ដែលមានសមាសភាពមកពីអន្តរក្រសួង ស្ថាប័ន ក៏ដូចជាការកំណត់អាទិភាពនៃការអភិវឌ្ឍវិស័យឌីជីថលនៅក្នុងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលក្នុងនីតិកាលទី៧ នៃរដ្ឋសភាផងដែរ។
ជាមួយនឹងសមាសភាពចម្រុះពីតំណាងស្ថាប័នសាធារណៈ វិស័យឯកជន ស្ថាប័នស្រាវជ្រាវ និងសមាគមពាណិជ្ជកម្ម ក្រុមនីមួយៗបានពិភាក្សាលើស្ថានភាពបច្ចុប្បន្ននៃការអភិវឌ្ឍសេដ្ឋកិច្ចឌីជីថល ការគំរាមកំហែង និងកាលានុវត្តភាព រួមទាំងការត្រៀមខ្លួនរបស់កម្ពុជាក្នុងការចូលរួមចរចាកិច្ចសហប្រតិបត្តិការសេដ្ឋកិច្ចឌីជីថល ជាពិសេសកិច្ចព្រមព្រៀងសេដ្ឋកិច្ចឌីជីថលក្របខណ្ឌអាស៊ាន ដែលគ្រោងនឹងចាប់ផ្តើមចរចាក្នុងឆ្នាំ ២០២៥ ខាងមុខនេះ។
ជាកិច្ចបញ្ចប់ ក្រុមការងារនៃអគ្គលេខាធិការដ្ឋាននៃគណៈកម្មាធិការសេដ្ឋកិច្ចនិងធុរកិច្ចឌីជីថល បានលើកទឹកចិត្តដល់អ្នកជំនាញ និងស្ថាប័នភាគីពាក់ព័ន្ធទាំងអស់ បន្តការចូលរួម និងផ្តល់កិច្ចសហការ ដើម្បីរួមចំណែករៀបចំរបាយការណ៍សិក្សា និងបម្រើជាមូលដ្ឋានក្នុងការកំណត់ជំហររបស់ប្រទេសកម្ពុជា សម្រាប់ត្រៀមខ្លួនធ្វើកិច្ចសហប្រតិបត្តិការក្នុងការចូលរួមរៀបចំកិច្ចព្រមព្រៀងសេដ្ឋកិច្ចឌីជីថលដ៏មានសារសំខាន់នេះនានៅថ្ងៃខាងមុខ ដោយចូលរួមផ្ញើធាតុចូលបន្ថែម តាមរយៈសារអេឡិចត្រូនិក digitaleconomy@mef.gov.kh
ជាលទ្ធផល ដំណើរការនៃកម្មវិធីកិច្ចពិភាក្សាតាមក្រុមប្រព្រឹត្តទៅដោយរលូន និង សម្រេចបានលទ្ធផលជាទីគាប់ប្រសើរតាមការំពឹងទុកថែមទាំងទទួលបានធាតុចូលជាច្រើនតាមរយៈការចូលរួមពិភាក្សាយ៉ាងសកម្មពីភាគីពាក់ព័ន្ធ និងអ្នកចូលរួម។